بسم الله والصلاة والسلام على رسول الله.
لاول مرة في المنتدى ندرج...
لكم اخواني الكرام قصيدة من قصائد الشاعر سعيد الشافي .
تحت عنوان ..............الخير ياسر
مال ابنادم هاكذا ولا داير **** عنده جوج اوجوه والثالث مدسوس
الخير منين اتشوف موجود اوياسر **** وابنادم يبكي او في حاله مخصوص
او عنده المال و الرزق أقناطر **** ومريض او معلول عايش بالمسوس
تباع الدنيا راه عمر اشكاير **** و ايمانه امشات يعبد غي لفلوس
اللي عنده الملك طرق لمسامر **** و احنا مازال باقي أرض احبوس
هاذ الوقت اصعيب و بنادم طاير **** و كلاو المسكين فالحق المنصوص
أوعلى المال الناس تجري و اتغامر **** و الشباب ايضيع فالبحار ايغوص
مال ابنادم هاكذا ولا داير **** عنده جوج اوجوه و الثالث مدسوس
او ليام امشات راحت اتگاصر **** انفضحت الكل و اتعراو الروص
ايديروا راس العام أول يناير **** هاذو مسلمين او قاعدة ماجوس
يحييو الحفلات غايطة و ابنادر **** تتخلط امرة او راجل قوم الروس
مال ابنادم هاكذا ولا داير **** عنده جوج اوجوه و الثالث مدسوس
مول العيب انسى احسابو كي داير **** ظالم طاغي راه فالدنيا محبوس
ابنادم مكريه في جوفه عامر **** من كثرة الحسد في گلبه مقروس
يغتبوا فالناس غايب او حاضر **** او فيهم السم ساكن او مغروس
مال ابنادم هاكذا ولا داير **** عنده جوج اوجوه و الثالث مدسوس
الولد على بوه و مه كي داسر **** احرش هاذ جيل قاجر او منحوس
يتربط اجميع من گالوا واعر **** لازم في عنگه ايديروا له ناقوس
مالساكت انخاف ذاك اللي ساهر **** خروف العيد ايبان مالرگبة مگروس
مال ابنادم هاكذا ولا داير **** عنده جوج اوجوه و الثالث مدسوس
لوقر راه امليح و اعرف اتعاشر **** رزقك كي تعطيه يرجعلك منقوس
رابح فالقانون و ايگولو خاسر **** داروا كلمة حق بالباطل ملبوس
مال ابنادم هاكذا ولا داير **** عنده جوج اوجوه و الثالث مدسوس
شوف ابنات الأًصل بالزين او باير **** هاذ اليوم اقليل وين اتشوف اعروس
ياحسرى افراشنا جوج احصاير **** هاني وسط اعيال و خبيز مرفوس
مال ابنادم هاكذا ولا داير **** عنده جوج اوجوه و الثالث مدسوس
اجري و ازرب راه الغاشي طاير **** منين ألحگنا كلشي راهو منكوس
لا تعيبش الناس راك أنت داير **** فاتت اعليا او مازالا مقروس
مال ابنادم هاكذا ولا داير **** عنده جوج اوجوه و الثالث مدسوس
تلفت ليا اليوم او راني حاير **** وين ادوايا وين نجبره مدسوس
عييت انسقسي شحال مازلت انشاور **** متحزم بالصح ما باغي كابوس
باين المعقول راه شي ظاهر **** ناس المعنة وين تفهم ذاك الهوص
هذا شافي راه صابر و ايكابر **** و المسلم ألخوه كالبني المرصوص
كذا من ديوان عمرت ادفاتر **** مادمت ابلا مال و كلامي مسوس
أطلبتك يا ربي الواحد القادر **** تغفر لينا اجميع ما يبقى مخصوص
الإثنين 15 مايو - 11:57
