بسم الله والصلاة والسلام على رسول الله.
كما واعدنا الاخوة الكرام وعودناهم بنشر قصائد الشعر الملحون.
ندرج في هذا الموضوع قصيدة اخرى من قصائد الشاعر الميلود بوصلعة.
شاعر قبيلة بني كيل.
في هذه القصيدة يجسد لنا الشاعر صورة معتبرة عن الحياة البدوية.
قصيدة اليوم تحت عنوان........البدو الرحل
والدنيا في حوالها كي بدالة **** يا بن سيدي عيد ذ التاريخ شهيد
كانو ناس زمان فيها رحالة **** وعطاطيش مهدجة وسلاك الصيد
في شاو المرحول ركبو خيالة **** واللي هوما قاصدين البعد اقصيد
رحالين البل زينة الحالة **** رحلو بيها قبل ما يوصل لحديد
البل الحمرة انواع السلالة **** واللي هي واصلة للرفد اتزيد
هاذي كحلة جات لخرى شوالة **** قبل طلوع الشمس بالرغيان تعيد
وعلى صبح الحال رفدو نقالة **** اغراير وحمال مخدومين باليد
طي الخيمة حنطوها بحبالة **** رافدها صبار لونه لون تميد
ويقطعو لمروث وقت القيالة **** رافدهم صراب وكوايل تصهيد
مولوعين الصيد لروي وغزالة **** ومراية الهند ينظر من لبعيد
ما يضرب فالصيد غير الشتالة **** متعلم صياد طراش التجنيد
ومعاهم سلاك فالصيد لوالة **** كل واحد معروف عند السبق عنيد
يبرز ويشوف عينو قتالة **** مع لرنب و الذياب يكون حكيد
كي ينظر للصيد يبقى يتكالى **** ما يهنى حتى يفكر واش يفيد
امربي وكلادته والدربالة **** غنسوها لو فالليالي وقت جليد
فكبير الكديم دارو شعالة **** بالطعمة وزناد راه اليوم وقيد
ويرحلو فالفجر ناس الموالة **** وكل يوم يحوسو لمحط جديد
ويراعو للما مشارع سيالة **** تكرع للغلم اللي مشارعها توكيد
نصبو لخيام ولحرايم شغالة **** وحدة تبني شوف لخرى واش تريد
المغزل والقرداش مع المندالة **** خدم الفلجة وروابع خرب عويد
القرويشة والرحى والمتفالة **** قمح المرواني مهلهل فيه سميد
وسمن العكة مرببينه قبالة **** والخبز المطلاع ومسمن وثريد
والمردود مزردينه جلجالة **** والترفاس واللواح وقديد
يمشو حطابات شبكة والفالة **** والحزمة فالظهر لحبل على الجيد
بنت البدوية يزار وخلالة **** خلخال الفضة منقش خط جريد
والمجدول محزماتو حمالة **** الحشمة والجود لحيا بالتوحيد
تركب العطوش هودج وكبالة **** والمهري مرسون ويتبع فالكيد
باباها معروف بنت الرجالة **** يوعدوه الناس ويجيو مواعيد
صيفط المرسول للجار تعالى **** راه جاو ضياف جمعهم سعيد
يذبح للميعاد غير الرخالة **** يتحمر كاشوشها بطياب الليد
كيسان البلار فالعين شهالة **** بابير نحاس وزي براريد
يشربو لتاي مع الهيلالة **** ويسمعو لكبيرهم فيه المفيد
والصينية والفراش و الجلالة **** والحضرة ولمداح في ذكر النشيد
شعر الملحون ناسو زجالة **** ينظمو ويحضرو بيت القصيد
وحرايم بصفوف فيها ولوالة **** والخيالة قادها فارس صنديد
والخيل لي مربطة كي صلصالة **** وعماير علقوها بالتزويد
او تفراج الكوم بارود تكالى **** وبارود من جعب يخرج شديد
وسلاهيم ومضال بيها ضلالة **** واللبس القديم منتوج التقليد
يعطيها بالعز عند العودالة **** يبدا لعراس كيما يوم العيد
راهم ناس الجود ماهم بوخالة **** والعاهد والصدق كلمة بالتنفيد
تلقا الراجل فيه كلمة معقولة **** ويلا عطاك العاهد ما فيه الترديد
ما يرضى بالطايحة والمذلولة **** ولد الخيمة ما يفخم بالتجبيد
الإثنين 15 مايو - 11:57
