يوم عراقي
د. ايما قمر- الولايات المتحدة الامريكية
اليوم وما أدراك ماذا حدث في هذا اليوم..
يوم عراقي عراقي عراقي بأمتياز .. مؤلم بكل معنى الكلمة.. بكيت بكل ما أوتيت من قوه..
مريضي كان عراقي من أهل الموصل.. من الناجين من أيدي داعش.. عمره 58..بقيت صافنه لدقائق بعمر المريض لأن عمره كان يبين 90سنه على أقل تقدير.. لا يتحدث الإنكليزية أبدا.. شعره أبيض بيه كل أنواع الأمراض النفسيه والجسدية وووو.. بسبب العنف الخوف ووو..
كان خائف جدا جدا بس أطمئن قليلا من عرف اني عراقيه.. طبعا مع التحفظ ع ذكر الاسم هذي المره لأن أحنا هنا.. Small Iraqi community.....
هنا بدت الرحله.. صباح الخير عمو أسمي أيما قمر واليوم حقوم بعمل فحوصات القلب الك.. ولتخاف ابدا حكون يمك طول اليوم.. طبعا بعد مأخذت التصريح من الدايركتر للبقاء معه طول اليوم.. لأن حاله خاصه.. لحين قدوم أهله اللي مايعرفون عنه أي شيء... بنتي اني كولش خايف... نزلت جلست عالارض حتى أكون قريبه من رأس المريض..
لزمت ايده بستها ..
عمو حبيبي لتخاف انت هنا بأمان واني يمك طووول اليوم..
ابدا لتخاف..
بدينا بعمل الفحص.. واني ايدي على جبينه عمو انت زين؟!!!!
اي بنتي زين .. دتشعر بأي شي عمو... لا بنتي الحمد الله... أحنا تقريبا حنكمل الفحص.. جوعان عمو؟!! اي والله بنتي وعطشان كولش ..
نكمل واجيبلك فطور وعصير.. لو تريد كهوه؟!!!
اي شي بنتي الله يرضى عليج رحمه الله والديج الله يحفظج أهلج على هالتربيه..
حبيبي عمو.. بسته من گصته وبدأ يبجي.. واني دموعي تنزل بصمت صمت قاتل وخنگه.. لتعوفيني بنتي الله يرضى عليج... ابدا عمو اطمن والله باقيه وياك إلى أن يجون اهلك.. حجالي قصص خلال فترة بقائي يمه وگفت عقلي حرگت روحي حرگ..أجوي أهله الأم باستني وحضنتني.. عمو حبيبي الف سلامه عليك.. بسته من ايديناته الاثنين..
بنتي بس طلب :
انت تامر عمو.. أريد عنوانكم حتى اجي اتشكر من اهلج...
عمو حبيبي انت اتكوم بالسلامه واني اجي ازورك لبيتكم اطمن عليك وعد مني..
واجيبلك ويايه ورد وبقلاوه وكاهي وگيمر نتريك سوا..
وأخيرا ضحكت حبيبي عمو بوسه عالگصه وبوس وحضن من العائله كلها...( كانت 26 ساعه من الألم الدموع والحزن.. والفرحه بآخر اليوم بأبتسامته ودعائه)..
الإثنين 15 مايو - 11:57
