بسم الله الرحمن الرحيم
اللهم صل على سيدنا محمد وعلى آله وصحبه وسلم تسليما
من كلام الفقير إلى مولاه حاكمي مصطفى البوشيخي غفر الله له
نشوف الشيخ في منامي، يطيب نعاسي ونصبح فرحان= سيدي ربي راك عالم، بالنية ما فيها خذلان
ياك ألي دار بيا، نقوله أنا لبويا = الله يخليك ليا نطلب المولى ينجيك
أنا خديم سيدي، وما نذخرش جهدي = وكل ألي كان ملكي، آ شيخي واهبه ليك
توحشت وجيت زائر، وبذا الدخلة ياك راني حشمان = نشوفه كي راه داير، سيدي حمزة ياك ماهو عيان
واش ينسيني فيك آي شيخي، واش ندير في بلاصة الحبيب = تعذبت وتاه عقلي،ومرض القلب ما نفع فيه طبيب
نخدمك وأنا ديالك، ونفذ يا أبا واش تقول = ولدك ماكان من يسالك، وقصدت الخير راه بابه محلول
تبعت أنا طريق أجدادي، وما نتلفتش للعدو واش يقول = نخدم وندير جهدي، وهذا الشيء ياك حق ومعقول
تبعت الطريق البيضا، وألي صاوبوها الأسلاف = ياك طويلة عريضة، وألي عاهد ما يدير الخلاف
طريق أسلافي صحيحة، ونخدمها بكل جهد وتقدير = عندي نية مليحة، وما فيها لا كذوب ولا تزوير
عاهدت ويطول وعدي، وبخدمة الشيخ راني فرحان = حفيد وهذاك جدي، وأنا مجتهد ماشي كسلان
قبضت الطريق بالنية، وكانت غادية في الأمان = لو كان نقولك ما بيا، وما دارولي أفام العديان
نسول الجاي مع الماشي، على شيخي ياك ما هو غضبان = نبات نوح في فراشي، يعلم ربي ياك راني حشمان
قلت أنا ندير جهدي، نكتم سري ما نخرجش العيب = عارف الدنيا طويلة، يا سيدي ياك تدي وتجيب
حطيت يدي في يد شيخي، واليمنى ألي شدت الشباك = نصبر وندير جهدي، نكتم سري ما نسبب هلاك
ذاك السهم ألي طعني، حرت أنا كي ندير نداويه = دخل لصدري عطبني، وجرح القلب فات شقه منهيه
أنت شيخي وليك نشكي، وطوال مرضي وبانت لعلال = نبات نوح في فراشي، وراني لبدا على هذا الحال
البستان ألي ورثته، نقشته بيدي، سقيته شحال = يبس قبال عيني، وشت ورده تحتت وذبال
تمت وبالخير عمت
الإثنين 15 مايو - 11:57
