’’ الشمعة’’

1. يـــا الشمعة باللـــه مـُرادي نــفهــــــــــم >< آش امْـــسَيّـَل دمـعتك قولي و عــْـــلاش
2. بـكْـيْـك راه أيْـنَطـّـَـق الطـُـوبَة و الصّــَــم >< حرّكْ ذات الراشْـيَة من تحت انْـــــــعاش
3. يا ذْ الجار ابْـــــــجاه مولاك اتْـــــــكَـلـّـَـم >< بَـعدن شفت انا احْــوالك ما نهنــــــــاش
4. إذا كــــــان الموت بين اهْلــك حَـــــــــوّم >< مصير الخــــلقة كُـلها تــركب لـَــنعــاش
5. ربي رايــد هاكذا لـَــعْــــمار اتــّــــــــــــم >< و ليه الطـّـَـــلبة بالصبر ما يْـبخلنـــــاش
6. إذا سعدك خاب و الفـــــــلك اتـْبَـــــــــرَم >< من بكري ذي اخْصايْـله ما تخفـانـــــاش
7. الدنيا كـِ هاك تصْحَى و اتْــــغـَـيــــّـَـــــــم >< بعد اقـْـــوَايل حامية يهدف رشـــــــراش
8. عـــيدْ عْـلِيَ بْـجـــــاه ربي لا تــْكـْتــــــــم >< راه سْــكاتـك هَـوضْ عْـلِيَ لـَوْحـــــــاش
9. جــاوبني لـله ما جــــــــــــاي انـْــــــــذم >< واش أيـْــذم اللي بْـحالي في كـمّـَــــــاش
10. قــالت كان اهـْداك ربـــــــــي يا مسلـــــم >< خــلـّيـني في حالتي يْـدزى تــنـبـــــــاش
11. راد عْـلِـيَ خالقي و الوقت احْـكــــــــــــم >< اجْعَـــل مني جْـليس لْـلـِّي هَـمّه حـــــاش
12. نـَنـْفـَق من عز المْـكاسب و انـْسَـلـَّـــــــم >< انـْفاجي عْلى اللي احْرْم نومـه ما جـاش
13. و الناس بْـلا وْنــيس مْنْسِـيّـَة فــ الهَـــم >< سهر الليل امْهَـش عْظامي تْهْشـــــــاش
14. الناس اتـْزيد بــــالوفا و انا نْـرجــــــــــم >< من لـيعات النار راني عـََََوْض فـْـــــراش
15. ذ المْْشعال ْْْايْـــــبات في لحمي يَـلطـــــــم >< شي فاض و شي معاشْْره غي بالتلكاش
16. يا سايــل جَهد الجمر قاوي يهــــــــــــزم >< و الجهد اللا جهـــد ربي ما طـُقـْنـــــاش
17. موت الحــُرمة واش جابَـه للمَـــجْـحــــم >< يا الشمعة تْـقـراحنا ما يــْْـتـْســـــــاواش
18. قارن بين شْـــعاب و الــواد اذا عَـــــــــم >< واش ايْـجيب النيل لمواجـن عطـــــــاش
19. لـَـو حالي من حالتك نُـــشكر دايـــــــــــم >< سعدك يا من مُـت دافي فوق فـْـــــــراش
20. لو نبدا فـ اللي اعْـشرني و امْــــــــــلازم >< تنسى من هـو بيك و اتْجـيني فــتـــــّاش
21. لـو نحكيلك عـَلتي يــنطق لبـكـــــــــــــــم >< يْـتـْحَـتــَّت صُلب الحْجر منها يهْـشــــاش
22. اذا نبكي نْـجوع عني تْــتْـلايـــــــــــــــــم >< يــشفع لِيَ عـاذلي بـعد التـَّغـْشــــــــــاش
23. أنتِ تحت النار جلدك يْــتْـلـَطـَّـــــــــــــــم >< وانا ناري في ادْخـالي ما تـطـفـــــــــاش
24. ضُرك ضُـر امْناوبة ما هو دايــــــــــــــم >< وانا ضري امْلازم الكــبدة قــــــــــــداش
25. ضـُرك باين كل مــن شافك يـفهــــــــــــم >< وانا قـُرب الناس لِيَ ما يــــــــــــــدراش
26. سـم اللـفعـة كانـْشي كيفه ســـــــــــــــــم >< راني بالكـيسان نـُشرب ما نـــــــــرواش
27. مْـتـْخالج لحمي بحبات الســاشـــــــــــــم >< سال عْـلى البارود جرحه ما يــبـــــراش
28. حالةْ طـَير ذْبـيح يـتـخـبـَّط فـ الـــــــــــدم >< واش ابْــقى للطير من بعد الـتــريـــــاش
29. جـُرحي بَعْـدَنْ طال بـِيَ و اسْـتـَــــــــوْرَم >< اسْـكن في لـُب العْضَى عاشر لـَحْـشــاش
30. خـلاني قـَـفـِّــّيت شـاون جـــــــــــــا زادم >< و احْلف لو ما افـْنِيت يْــعشر ما يَـفـْناش
31. راه اهْـداني مْثــيل صوفـَة تـْـتـْبـَشـَّـــــــم >< تـْتـْلاوح ما بـِين كـَفـَّات القـــــــــــرداش
32. راني بـِين اسْواق همِّــي يـْتـْســــــــــاوم >< البايـع جـزار و الشــاري كــــــــــــواش
33. احْـمل فِـيَ سَيْـل مْجهد جــــا عايــــــــــم >< دَرَّع بـِيَ في بـْحْـر هايج مـُوحــــــــــاش
34. واش ايْـقـْد سْـفِـيـنـْتـي ليه اتـْقـــــــــاوم >< بعدن طاح قـْلاعها و اضْحَى قـشـقـــاش
35. تـْتـقاذف لَـمْـواج بـِيَ تـْتــــلاطـــــــــــــم >< وانا عـُقْـب لْـواحها ديـما فـَــتـَّــــــــــاش
36. صَـبـْري صبر الشـاةْ فـي عـيد المجـــرم >< لا سَلاك ايْـغـيثــها مـن ذ المُـكــــــــراش
37. راس الكـُبّـَة ضاع و الخـيْط اتـْسَرْســـــم >< و اتـْلْف شَوْري و لا اعْرفت انا ذا واش
38. أنا بـِيَ غْـرامها صاف المـَبْـســــــــــــــم >< و بْلا سْبـَّة عاداتـني زِيـنْـةْ لـرمـــــــاش
39. كـِ صَدّتْ خــلاتـني بـَنْـي مْعَــــــــــــــــرم >< لا من يُقـرب جيهتي غير الخـفـــــــــاش
40. حتى المـرسم بعدها ما هـو مـرســـــــــم >< راه ابْقـَى للبُوم دارت فـيه عْـــشــــــاش
41. هـيهات اذا كان سعدي يـْتـْسـَقــَّّــــــــــــم >< المرض اللي صابـــــني ما يْــــــــدّاوَاش
42. قـلبي حالف دونها يـبقى صايـــــــــــــــم >< و عـوز الوالي وين كانت ما يـرجــــاش
43. يا سايـل عَسْل النحل وَلـَّى عـلقــــــــــــم >< شوك الـدَّرقـة من اللحم ما يـتـنـقـــــاش
44. ما طـُقنـا لـفراقهم ربي عالـــــــــــــــــــم >< ما طـُقـنا لـمحاين القـلب الـمـُغشــــــاش
45. إذا تبغي سْمـية اللي هو ناظـــــــــــــــــم >< عين و ميم بـعدها را لا تـنســــــــــــاش
46. عمراوي فـي بـْرور لـَجدار اتـْعلـــــــــــم >< و ناسي غربي آفلو زينْةْ لـَعـــــــــــراش
47. لا تـْحسبني فـْقيــه للحكمة يَـنـظـــــــــــم >< غير الدهر بـْحكمته فينا شـَلـْــــــــــواش
48. نـْـسْتـَسْمح لـَشياخ فيما قــال الفـــــــــــم >< و صنعة دون اشْياخ لا تـتـعـلمهـــــــاش
49. باسم الـمَوْلى خالقي قـَوْلي نَـختـــــــــــم >< و صلوات على النبي ما تـْتـَّحْـصــــــاش
50. قـدّن ما مَـوجود فـ الكـون نـْــعايــــــــــم >< و نعمة ربي فايـضة لا تـحسبهـــــــــاش


السلام علبكم

• هذه القصيدة لصاحبها زيار اعمر بعنوان ’’ الشمعة’’.
• قد تحوي أخطاء فيرجى ممن له معرفة بها تصحيح النقص.
• لعدم معرفتي بصاحبها فلا أعلم إن كان يوافق على نشرها أم لا, أعجبتني القصيدة و أحببت مشاركتها الآخرين كما قد تفيد أحدا ما.
• لا أنسى شكر الأخوين عبد الله بحوصي و CHEIKH لتشجيعهما الدائم و معذرة إليهما خصوصا لعدم الرد سابقا فقلما أزور النت.

» قولي لي يا الشمعة
» تفسير حلم رؤيا الشمعة في المنام
» تفسير حلم رؤيا الشمعة في المنام