صديقي براء
صديقي براء خرّيج معهد فنون،قسم موسيقى
قبل سنتين تقريباً تعيّن معلّم فنية بإحدى المدارس بمنطقتي الشعبية..
ولأنّه ساحب سلفة علمود يتزوج يكون راتبه الشهري تقريباً 3000 ألف لذلك صار يدرس بمدرسة اهلية ايضاً علمود يلحّگ ..
الولد قدّم يدرس بلكوريوس وجاي يمشي بالمعاملة علمود يسووله تفريغ ويروح يكمل دراسته،هم شي هو يحبه وهم راتبه يزيد بعدها..
بمدرسته اكو صفّين بدون معلمة،لان وحدة ماخذه اجازة بدون راتب والثانية إجازة أمومة وهيچ شي المهم صفّين بدون معلّم.. صاحبي راح للمديرة،گلها ست فرغيني من درس الفنية واني اتكفّل بهالشعبتين ادرسهم كلشي..لان جايه نصف السنة وخطية كلشي ميعرفون واني راح اعوف البكلوريوس هاي السنة لحد ما يجون معلمين بهالصفين عود اكمل دراسة.رجع براء اخذله يوم باليوتيوب يدور طرق تدريس وغيرها من الامور وصار يدرسهم.. يگول اجيهم من الصبح،اشغللهم موسيقى وانطيهم وقت ياكلون بيه وبعدها نبدي الدرسشعبة حقق بيها نجاح بنسبة 1000% والشعبة الثانية فقط اربعة رسوب من أصل اربعين طالب أو أكثر..من غير الطلاب الي كان وضعهم بائس وتحسنوا على ايده وصاروا متفوقين .. كل شهر يشتري سحبة من راتبه،يعلّگها بالشعبة،واليّ ياخذ عشرة يخلّيه يسحب شيطلعله ياخذه.. بحيث الشعبة الاغلبية صارت تاخذ عشرة علمود السحبة وعلمود لا يزعل عليهم لان كلش صاروا يحبوه.. يگول عندي طالبة حيل وكحة،لدرجة تعضّ بالطالبات،يگول كتبتلها ورقة وخلّيتها بظرف ووياها وردة ورشّيتها بعطر وكتبت بيها "شكراً لجهودكم المبذولة" وگاللها وديها لأهلچ..يگول ثاني يوم البنية صايرة عاقلة كلش،سألتها انطيتيها لأبوچ ؟ گالت اي استاذ،واخذني للسوگ اشترالي لعّابة،وگلي اذا بقيتي عاقلة وشاطرة هيچ وانطوج بعد ظرف هم اشتريلج لعّابة ! حل مشكلتها بدون ميضربها،وبدون ميدز على أهلها ويخلّيهم يضربوها والبنية هسّة شاطرة وكلّه عشرات..هذا مثال للمعلّم،الّي فعلاً صار نبي..كل عام وانت بخير 
❤
الإثنين 15 مايو - 11:57
