كُــونْ عَــاقَــلْ
يَا صَاحْبِي هْدَا وْكُونْ عَاقَلْ -- تْرَبَا وْبَرْكَا مْنَ الطْيَاحَا
حْشَمْ لَا تْكُونْشْ باَسَللْ -- وَالْبْسَالَة مَاشِي مْلِيحَة
وْزَنْ قَبْلْ مَا تْجَـادَلْ -- بَالْسَانَكْ أَشْرِي المْلَاحَة
لاَزَمْ تَقْرَا بَاشْ تَدْخُلْ -- تَتْعَلَّمْ وَطِّيعْ لَلشْيُوخَة
مَا هُوشْ بَالْجَهْلْ تْكُونْ رَاجَلْ -- الرُّجْلَة عْقَلْ هَا الخْشِينْ
الَطايَرْ وَلَابُدْ يَنْزَلْ -- وَالفَاهَمْ يْكوُنُ رْزِينْ
ياَ صَاحْبيِ هْدَا وْكُونْ عَاقَلْ -- بَالحَكْمَة الصَاعْبَة تْلِينْ
بَالعَقْليَة كُلْشْ يَسْهَلْ -- وَالصَامَطْ يْوَلِي بْنِينْ
الوَقْـتْ تْبَدَّلْ هَالمْخَلْخَــلْ -- اتْرَبَـا وَلَّا أتَّمْحَــــــــا
المَشْيَاخَة مَا هِيشْ لَاتْدَلَـلْ -- بَرْكَا مَادَايَرْالفْضِـحـَــة
الي بـْغـَا دُونْ عَلْمْ يُوصَلْ -- يَتْنَحَّا وِيْذُوبْ كِالْمَلْحَـة
الي مَا قْرَاشْ غِيرْ يَرْحَلْ -- يْرُوحْ يْشُوفْ كَاشْ الصَّرْحَة
الوَقْتْ تْبَدَّلْ هَا المْغَفَّلْ -- وَالصْغَارْ رْاهُمْ طَالْعِينْ
الي مَاهُوشْ صْحِيحْ يَفْشَلْ -- وِيْحُطُو مَنُّو العَيْنْ
يْوَلّي كاِلبْهيمْ يَصْهَلْ -- وَالنَّاسْ مَنَّهْ كَارْهِينْ
بْنَادَمْ فِي صِفَتْ بْغَلْ -- حَشَاكُمْ يَا السَامْعِينْ
بقلم بن عومر
الإثنين 15 مايو - 11:57
