يْلُومْنِي مَنْ لَا لِيهْ اعْقَلْ** قصِيد منْقُول
قَادَرْ الله يَبْلِيهْ بِمَا ابْلاَنِي **** ثُمَّ يَعْذَرْ وَ يَسْتَمْثَلْ
رَقْ جَسْمِي وَ الشُّوقْ سَكَنْ اكْنَانِي **** وَ الْتَبَسْ عَقلِي وَ اتْزَلْزَلْ مَنْ غُرَامْ حْبِيبِي كَثْرُوا امْحَانِي **** يَا اهْلْ القَمْنَة كِي نَعْمَلْ
ذَا الهَوَى رَشَّالِي عَظْمِي افْنَانِي **** ايْلُومْنِي مَنْ لاَ لِيهْ اعْقَلْ
قَادَرْ الله يَبْلِيهْ بِمَا ابْلاَنِي ****ايْلُومْنِي مَنْ لاَ لِيهْ اعْقَلْ
يَا قْوِيدَرْ لَخْطِيبَكْ رُوفْ **** مْنَ الجَفَا يَا سِيدِي بَرْكَاكْ
طَالْ ظُرِّي وَ امْلَكْنِي خُوفْ **** مِنَ المْحَايَنْ وَ طُولْ جْفَاكْ
يَا ايْمَامْ أهْلْ التَّصُوُّفْ **** ضِيفْنِي وَ انْعَمْلِي بالقَاكْ
طُولْ عُمْرِي نَتْمَنَا انْشُوفْ **** غِيرْ فِي المَنَامْ لُوكَانْ انْرَاكْ
يَا ادْرَى نُوصَلْ لَلْمُوصَلْ **
كَنَغْنَمْ الرُّؤْيَة اتْشُوفْ اعْيَانِي **** فِي البَهَا وَ الحُسْنْ الكَاملْ
بِيكْ نَظْحَى نَفْخَرْ وَ انْقُولْ جَانِي **** انْوَصَّفْ بْهَاكْ لِمَنْ يَسْألْ
عَالوْصَافْ نْرَتَّبْ صَحْ الوْزَانِي **** نَنْسَجْ عَلَى مَلْقَاكْ احْلَلْ
لاَ تْخَيَّبْ ظَنِّي يَا نُورْ اعْيَانِي **** يْلُومْنِي مَنْ لاَ لِيهْ اعْقَلْ
قَادَرْ الله يَبْلِيهْ بِمَا ابْلاَنِي **** ايْلُمْنِي مَنْ لاَ لِيهْ اعْقَلْ
لاَ اتْخَيَّبْ ظُنْ المَدَّاحْ**** لاَ اتْجُوّزْ المَنْسُوبَة لِيكْ
لاَ اتْخَلِّينِي لَلْجِيَّاحْ**** يَا مَحْبُوبِ العَارْ عْلِيكْ
بَنْ طَبْجِي كُلْ امْسَاء وَ اصْبأحْ**** يَفْتَخَرْ فَارَحْ قَلْبُه بِيكْ
غِيثْنِي يَا قُطْبْ الصُّلاَّحْ****ذَا الفَصِيحْ اهْرَبْ لَمُه لِيكْ
يَا امْسَلَّكْ مَنْ هُو حَاصَلْ*
يَا مُغِيثْ الشَّانَقْ يُومْ لَسْجَانِي**** يَا طْبِيبْ لِكُلْ اعْلاَيَلْ سَرَّكْ اشْتَهَرْ فِي جْمِيعْ لَوْطَانِي**** فِي لَقْطَابْ عْلاَمَكْ صَايَلْ
فَوْزَكْ رَبِّي فِي الْقَصِي وَ الدَّانِي**** كُلْ وَالِي عَنْدَكْ يَكْمَلْ
جَعْلَكْ الله بَرْزَخْ المَعَانِي**** ايْلُمْنِي مَنْ لاَ لْيهْ اعْقَلْ
قَادَرْ رَبِّي يَبْلِيكْ بِيمَا بْلاَنِي**** ايْلُومْنِي مَنْ لاَ لِيهْ عْقَلْ
يا إمَامْ أهْلْ الله بَرَّمْ**** غِيثْ مَدَّاحَكْ يَا سُلْطَانْ
يَا فَحْلْ لَقْطَابْ اتْقَدَّمْ**** فُكْنِي مَنْ هَاذُو لَحْزَانْ
عِيبْ كَانْ اليُومْ اتْسَلَّمْ**** فِي خْدِيمَكْ يَا غَالِي الشَّانْ
ظَاقْ أمْرْي وَ ادْرَكْنِي هَمْ**** عُدْتْ فِي مِزَانْ النُّقْصَانْ
ذَابْ لَحْمِي وَ العَظْمْ أنْحَلْ*
بَعْدْ عَزِّي رَاهُ فِي الرُّخْسْ شَانِي**** مَنْ جَفَاكْ القَلبْ امْهُوَّلْ
بَالبُكَاء مَنْ وَحْشَكْ سَخْفُوا اجْفَانِي**** لاَ تْظُنْ الدَّمْعَة تَبْطَلْ
فُوقْ خَدِّي مِدْرَارْ بَرقْ المْزَانِي**** غِيرْ نَتْمَشَّى وَ انْسُوَّلْ
حَدْ مَا يَعْذَرْنِي فِي ذَا الزّْمَانِي**** ايْلُومْنِي مَنْ لاَ لِيهْ اعْقَلْ
قَادَر الله يَبْلِيهْ بِمَا ابْلاَ نِي**** ايْلُمْنِي مَنْ لَا لِيهْ اعْقَلْ
مَا بَقَى مَنْ يَعْذَرْ عُشَّاقْ**** جِيلْنَا قُومُو مُخْتَلْفَة
مَا بْقَى صِدْقْ و لاَ إتِّيفَاقْ**** لاَ مَحَنَّة وَ لاَ رَأفَة
مَا بَقَى عَاهَدْ وَ لاَ مِثَاقْ **** حَدْ مَا مِنَ اتْقُولْ اتْعَافَة
نَسَّألَكْ بِرَاكَبْ البُورَاقْ**** رَدْ مُرِيدَكْ بالحَافَة
لاَ اتْخَلِّينِي نَتْعَطَّلْ*
فُكْنِي مْنَ الشَّدَة وَ اتْلَقْ اسْجَانِي**** وَطُبْ جَسْمِي مَنْ لَعْلَلْ
بِيكْ رَبِّي قَبْلْ صِيَّامِي ابْلاَنِي**** عِيبْ كَانْ عليَّا تغْفَلْ
لاَ اتْخَلِّي ذَا اللُّومْ عْلِيكْ ثَانِي**** صَاحَبْ الَّرَّقْيَة مَا يَنْذَلْ
مَنْ صَاحَبْ ابْطَلْ فَازْ عَلَى القْرَانِي**** ايْلُومْنِي مَنْ لاَ لِيهْ اعْقَلْ
قَادَرْ الله يَبْلِيهْ بِمَا ابْلاَنِي**** ايْلُمْنِي مَنْ لاَ لِيهْ اعْقَلْ
كُلْ مَنْ يَصْحُبْ سِيَّدْ ايْفُوزْ**** فِي حْمَى سِيدُه يَسْتَذْرَى
عَلَى المَضَايَق يَزْعَمْ وَ ايْجُوزْ****يَرْتَفَعْ دُونْيَا وَ أخِرَة
قِيمْتُه فِي الدُّنْيَا مَعْزُوز**** مَا ايْجُوعْ وَ لاَ يَتْعَرَّى
المَسَلَّكْ مَنُّه مَحْرُوزْ**** يَا الفَحَلْ جِيّدْ اليُوسْرَى
مَا بْحَالَكْ يَا لَعْرَجْ بْطَلْ*
بِيكْ نَالُوا لضشْيَاخْ أهْلْ التًّدَانِي**** صُبْحْ وَ مْسَاء بِيكْ انْهَلَّلْ
نَحْمَدْ الله فِي احْمَاكْ اتْلَقْ السَانِي**** يَا حْبِيبِي لِيَّا عَجَّلْ
الهَوَى خَلْخَلْ لِي ذَهْنِي ابْلاَنِي**** ايْلُمْنِي مَنْ لاَ لِيهْ اعْقَلْ
قَادَرْ الله يَبْلِيهْ بِمَا ابْلاَنِي**** ايْلُومْنِي مَنْ لاَ لِيهْ اعْقَلْ
نَحْمَدْ الله خَالَقْ لَشْيَاتْ **** يْشْرَحْ صَدْرِي لَلْمُوهُوبْ
نَمَّدْحَكْ بَقْوَافِي لَبْيَاتْ **** بِيكْ نَبْلَغْ جَمْعْ المَطْلُوبْ
لاَ اتْخَلِينِي لَلتِّيهَاتْ **** رُوفْ عَنِّي وَ اوفِي المرْغُوبْ
نَرْغَبَكْ يَا سِيدْ السَّدَاتْ **** لاَ تْخَلِّي حَالِي مَكْرُوبْ
بِجَاهْ كُلْ نَابِي مُرْسَلْ*
فِي غُرَامَكْ رَانِي مَمْحُونْ فَانِي**** مَثْل مَنْ فِي السَّجْنْ امْسَلْسَلْ
وَ انْتَ يَا جَلُّولْ عَنِّي غَانِي**** لاَشْ فِي وَعْدِي مَا اتْسَهَّلْ
هَاكْذَاكْ اهْدِيتْنِي كَثْرُوا اغْبَانِي**** مَنْ سَجْنْ الشُّوقْ امْخَبَّلْ
حُبَكْ اسْكَنْ مِيرْ المُهْجَة اسْبَانِي**** ايْلُمْنِي مَنْ لاَ لِيهْ اعْقَلْ
قَادَرْ الله يَبْلِيهْ بِمَا ابْلاَنِي**** ايْلُومْنِي مَنْ لاَ لِيهْ اعْقَلْ
فِيكْ زَاوَقْتْ يَا بَحْرْ الجُودْ**** لاَ اتْخَلِي عَبْدَكْ مضْيُومْ
فُكْ سَجْنِي مَنْ كُلْ اقْيُودْ**** كُونْ لِيَّا فِي يُومْ الشُّومْ
اهْرَبْتْ لِيكْ يَا أسَدْ الأُسُودْ**** بَشَّرْنِي وَالُو فِي النُّومْ
لاَ تْخَلِّينِي مْقَيَّدْ مَلْظُوظْ**** يَا قْوِيدَرْ يَا غَالِي السُّومْ
لاَ اتْخَلِّينِي تَايَهْ هَامَلْ*
بِيكْ عَبْدْ القَادَرْ سَاغْ الوَزَانِي **** عَاشْقَكْ مَا هُو يَتْبَهْدَلْ
يَا المِيرْ انْعَرْنِي وَ انْعَرْ اخْوَانِي **** وَ وَلْدِيّا وَ جْمِيعْ الأهْلْ
لاَ اتْسَلَّمْ فِي كُلْ مَنْ ابْغَانِي **** بِجَاهْ نَبِينَا المُفَضَّلْ
عْلِيهْ صَلَّى الله رَاهَفْ البْدَانِي **** ايْلُومْنِي مَنْ لاَ لِيهْ اعْقَلْ
قَادَرْ اللْه يَبْلِيهْ بِمَا ابْلاَنْي **** ايْلُومْنِي مَنْ لاَ لِيهْ اعْقَلْ
*تَمَّتْ بِعَونِ الله *
الإثنين 15 مايو - 11:57
