افتراضي *الفِرَاقْ * لِلشّاعَرْ محَمَّدْ بَنْ اسْمَاعِيلْ*

*الفِرَاقْ * لِلشّاعَرْ محَمَّدْ بَنْ اسْمَاعِيلْ*
ضَاعْ صَبْرِي وَ اثْقَلْ حَمْلْ الْهَوَى عْلِيَّا **** وَ الفْرَاقْ حَرَّكْ لِيَّا بَالجُيُوشْ وَ رْمَاحْ
حَاطْ مِيرْ الهَجْرَة بَعْصَكْرُو اقْوِيَّا **** صَارْ يَامَرْ لَعْذَابِي فِي المَسَاء وَ الصَّبَاحْ
يَا إلَهِي وَ الْطَفْ يَا ذَالكْرِيمْ بِيَّا **** طَالَتْ أيَّامْ الهِجْرَة وَ انْحَيَاوْ لَجْرَاحْ
مَنْ فِرَاقْ احْبَابِي تَجْرِي دْمُوعْ لَلْمَاحْ *****
*استخبار *
أسَاءْ الدَّهْرْ لَمَّا افْتَرَقْ مَجْلَسْ لَحْبَابْ **** لاَ طَمْعْ وَ لاَ إيَّاسْ فِي الوَعْدْ الطَايَلْ
سَايَلْ وَاقَفْ حْقِيرْ فِي عَتْبَةْ لَبْوَابْ **** نَرْجَى وَعْدْ الفْضِيلْ بَالدَّمْعْ السَّايَلْ
مَا صَرْفُونِي بْقُولْ مَا نَطْقُوا بَجْوَابْ **** فِي عِينْ أهْلْ الهَوَى بْقَى قَلْبِي حَاصَلْ
فِي بَابْ الجَافْيِينْ نَطْمَعْ كِالسَّايَلْ ****
*مَطْلَعْ*
أشْ طَامَعْ فِي بَابْ الجَافْيِينْ تَلْقَاهْ **** حِينْ غَلْقُوا فِي وَجْهَكْ بَابْهُمْ وْ صَدُّوا
اطْلُبْ الله فِي حَوْلَكْ أنْ يْجُودْ بَرْضأهْ **** جَوَّزْ قْضَا مُلاَكْ عَلَى تْمَامْ وَعْدُو
قَابَلْ أيَّامْ الهَنَاء بَالحْبِيبْ تَلْقَاهْ **** بَالسُّرُورْ وْ لَفْرَاحْ أيَّامْنَا ايْعُودُوا
*بيت*
رَاهْ قَلْبِي عَسَّاسْ لْبَابْ كُلْ ثْنِيَّة **** دَاوْمُوا الصَّهْرْ اعْيُونِي فِي الدِّيَّاجْ نُوَاحْ
مَا انْزُولْ عْلَى حُبَكْ يَا طْبِيبْ دَايَا **** لُو ايْبَرَّحْ بَاخْبَارِي فِي لْسُوَاقْ بَرَّاحْ
يَا إلَهِي وَ الْطُفْ يَا ذَالكْرِيمْ بِيَّا **** طَالَتْ إيَّامْ الهِيجْرَة وَ انْحَيَاوْ لَجْرَاحْ
مَنْ فْرَاقْ احْبَابِي تَجْرِي دْمُوعْ لَلْمَاحْ****
*استخبار *
لَوْ يَنْطَقْ البْرِيحْ بِيَّا فِي لَسْوَاقْ **** ايْخَبَّرْ بَقْصَيْتِي وْ يَشْرَحْ مَعْنَاهَا
لَوْ يَجْرِي بِيَّا احْكَامْ أمِيرْ العُشَّاقْ **** بَعْدْ قَاضِي الهَوَى مِنَ النَّصْ افْتَاهَا
لاَزَلْتْ وْ لاَانْزُولْ لَلْقَاكُمْ مَشْتَاقْ **** حَتَّى تَمْضَى الرُّوحْ لَلْقَاء مُولاَهَا
عِينِي لَلْقَاء الحْبَابْ مَتْعُوبْ ضِيَاهَا ****
*مطلع*
مَا اتْزُولْ اتْشَايَعْ لَلْقَاء الحْبَابْ عِينِي**** فِي النَّهَارْ وْ فِي اللِّيلْ احْرَمْلِي المَنَامْ
الغَرَامْ اتْقُوَّا وَ اخْذَا العَقَلْ مَنِّي **** حَطْ عَنْدِي بَمْحَالُو وَ انْصَبْ لَخْيَامْ
مَنْ فِرَاقْ احْبَابِي زَادُوا الحْزَانْ حُزْنِي**** لاَ اهْنَا لاَ رَاحَة لاَ عِيشْ مُسْتَقَامْ
*بيت*
مَا ابْقَاتْ مَنْ بَعْدْ قَصَّةْ قَصْتِي قْصِيَّة **** طَارْ طِيرِي وَ افْرَغْ قَفْصِي مِنَ الوَكَرْ رَاحْ
بَعْدْ هَجْرَة لَحْبَابْ الطَّايْلَة عْلِيَّا **** لاَ بْشِيرْ ايْجِينِي مَنْ عَنْدْهُمْ نَرْتَاحْ
يَا إلَهِي وَ الْطُفْ يَا ذَاكْرِيمْ بِييَّا **** طَالَتْ إيَّامْ الهِجْرَة وَ انْحَيَاوْ لَجْرَاحْ
مَنْ فْرَاقْ احْبَابِي تَجْرِي دْمُوعْ لَلْمَاحْ ****
*استخبار *
بَخْلُونِي بَالْجْوَابْ حَتَّى فِي الاوْرَاقْ**** اتْعَيَّنْ مَنْهُمْ فَرْحْ فَرْحُوا لَفْرَاقِي
مَنْ قَهْرْ الحُبْ وَ الجْفَا ظَاقْ أمْرِي ظَاقْ**** وْ جُوَّرْ عْلِيَا الفْرَاقْ وْ أمَرْ لَحْرَاقِي
تَرْحَمْنِي أرْضْكُمْ بَنْسَايَمْ لَشْوَاقْ**** لَكِنْ عَادَةْ الزَّمَانْ يَفْرَقْ وَ ايْلاَقِي
لاَزَلْتْ وْ لاَنْزُولْ بَهْوَاكُمْ امْخَمَّرْ بَاقِي****
*مطلع*
مَا انْزُولْ امْخَمَّرْ بَهْوَاكْ طُولْ عُمْرِي **** حَتَّى نَلْبَسْ لَكْفَانْ وَ انْعَاشْرْ اللُّحُودْ
مَا بْقَاتْ النِّيَا لَحْبَابْ انْوَاوْ هَجْرِي **** كِيفْ نَكْتَمْ سَرِّي وَ امْدَامْعِي شْهُودْ
مَا اخْطَرْ فِي بَالِي فْرَاقْهُمْ سْبَابْ ضُرِّي **** وَ لاَ اعْرَفْنَا لاَحْبَابْ ايْخَالْفُوا العُهُودْ
*بيت*
صَبْرِي تْرَا لله فِي مَا قْضَى عْلِيَّا **** مَا ايْدُومْ عَلَى حَالُو إلاَّ الكَرِيمْ فَتَّاحْ
مَا ابْقَاتْ بْسَلْوَانْ عْلَى مْلُوكْ دَنْيَا **** ايْفَاقْدْ الدَّهْرْ بَمْرَارُو بَعْدْ عْسَلْ لَجْبَاحْ
يَا إلَهِي وَ الطُفْ يَا ذَالكَرِيمْ بِيَّا **** طَالَتْ إيَّامْ الهَجْرَة وَ انْحَيَاوْ لَجْرَاحْ
مَنْ فْرَاقْ اْبَابِي تَجْرِي دْمُوعْ لَلْمَاحْ ****
*استخبار *
مَا دَامْ الدَّهْرْ بالسّرُورْ عَلَى سُلْطَانْ **** مَا ثَمَّا فِي الزَّمَانْ مَنْ يَبْقَى سَالِي
هَكْذَاكْ انَا بْقِيتْ مِنَ الفُرْقَة دَهْشَانْ **** بِينْ سُيُوفْ الهَوَى بَعَضَادْ انْشَالِي
بَالهَجْرَة وَ المْنُونْ مَا يَرْجَحْ مِزَانْ **** نَحْكِي خَبْرْ الفِرَقْ لَمْلاَكْ سُؤالِي
مَالِي صَبْرَة عَلَى الجَافِي ظَايَقْ حَالِي ****
*مطلع*
مَا صْبَرْ كِي صَبْرِي مَنْ ظَاقْ بِيهْ حَالُو **** مَنْ عْذَابْ الهِجْرَة وَ امْحَايْنْ الفْرَاقْ
يُومْ صَدُّوا لَحْبَابْ بْلاَ وْدَاعْ رَحْلُوا **** بْقَاتْ عِينِي تَجْرِي بَمْدَامْعْ الشُّوَاقْ
فِي بْلاَدْ بعِيدَة ذَالجَافْيِينْ نَزْلُوا **** وَ التَهَوْ ابْغِيرِي وَ بْقِيتْ فِي حْرَاقْ
*بيت*
نَاكْرِينْ الآحْسَانْ عْلَى تْمَامْ لَشْيَاء **** وَ انْعَكْسَتْ لِيَّامْ الفَايْتَة بْلَفْرَاحْ
مَا احْسَبْنَا لَحْبَابْ الخَادْعِينْ نِييَّة **** لَكِنْ الله ايْجَازِي كُلْ ذَا بْمَا صَاحْ
يَا إلَهِي وَ الطُفْ يَا ذَ الكَرِيمْ بِيَّا **** طَالَتْ لإيَّامْ الهِيجْرَة وَ انْحَيّاوْ لَجْرَاحْ
مَنْ فْرَاقْ احْبَابِي تَجْرِي دْمُوعْ لَلْمَاحْ****
*استخبار*
يَوْمْ انْ يُجْزَى العَبْدْ بَافْعَالُو تَحْقِيقْ **** يُومْ الحَشْرْ الشَّدِيدْ مَا تْفِيدْ انْدَامَة
ايْطُولْ حْسَابْنَا مْعَ مَنْ كَانْ صْدِيقْ **** اهْجَرْ لَرْصَامْ رَاحْ نَاوِي لْإقَامَة
خَلَّى نَارُو تْزِيدْ فِي القَلْبْ حْرِيقْ **** وَ ادْمُوعِي سَايْلِينْ عَلَى الخَدْ اسْجَامَا
وَ صْبَحْ فْرَاقْ لَحْبَابْ كَحَشْرْ القِيَّامَة ****
*مطلع*
مَعْظَمْ صْبَاحْ فْراقِي بَالحَبِيبْ وَ اهْواهْ **** حِينْ بَقَانِي بَالسّْلاَمَة وَ فْرَغْ لَرْصَامْ
يَا دْرَى نَبْقَى حَتَّى انْعُودْ نَلْقَاهْ **** غِيبَتْ نْهَارْ عْلِيَّا فِي عَوْضْ عَامْ
مَصْعَبْ إيَّامْ الهِيجْرَة وَ الغُرَامْ مَقْوَاهْ **** لاَ طْبِيبْ ايْعَالَجْ يَبْرِي مِنَ السّْقَامْ
*بيت*
زَادَتْ الفُرْقَة شَعْلَتْ فِي نَارْ احْشَايَا **** وَ المْحَبَّة كِالْبَحْرْ تْمُوجْ بِيهْ لَرْيَاحْ
مَنْ حَدِيثْ أهْلْ العِلْمْ انْجَمْعَتْ الثَّرِيَّا **** خَاذُوا مِنْ عِلْمْ الذُّوقْ العَالْمِينْ شُرَّاحْ
يَا إلَهِي وَ الطُفْ يَا ذَالكْرِيمْ بِيَّا **** طَالَتْ إيَّامْ الهِيجْرَة وَ انْحَيَاوْ لَجْرَاحْ
مَنْ فْرَاقْ احْبَابِي تَجْرِي دْمُوعْ لَلْمَاحْ ****
*استخبار *
مَنْ عِلْمْ الذّوقْ رَايْقِينْ الحُبْ ارْوَاو **** كَتْبُوا فِي جْدَاوَلْ الهَوَى بَالسَّرْيَانِي
حَتَّى لِمُنْتَهَاهْ الشّرَاحْ افْتَاوْ **** صَابُوا شَرْحْ الفْرَاقْ فِي الجُزْءْ الثَّانِي
عَجْزُوا عَلَى النَّطْقْ بَالفِيكْرْمن الوَجْدْ اخْذَاوْ **** قَالُوا الصَّبْرْ بَابْ يَجْلِي الاحْزَانِي
أحْمَدْ مُولاَكْ عَلَى تْمَامْ الإحْسَانِي ****
*مطلع*
نَحْمَدْ الله مَنْ فَضْلُو لِيَّا اسْتَقَامْ سَعْدِي **** جَادْ لِيَّا بَاكْمَالْ الفَرْحْ وَ السُّرُورْ
مَا بْقَالِي مَا نَحْزَنْ وَ الحَبِيبْ عَنْدِي **** فِي مْكَانِي نَايَمْ خَافِي وَرَاء السُّتُورْ
لاَ رْقِيبْ وَ لاَ حَاسَدْ نَلْتْ بِيهْ قَصْدِي **** فِي اهْنَا طِيبْ مْنَامُو طَالْقْ اليْزُورْ
*بيت *
حِينْ يَقَّظْتُو وْ فَاقْ وْ قُلْتْلُو هْنِيَّة **** وَ النَّسَايَمْ تَجْلَبْلُو فِي اهْبُوبْ لَرْيَاحْ
بِيهْ انْجَدَّدْ فَرْحِي فِي الصُّبْحْ وَ العَشِيَّة **** مَعَ طْلُوعْ الغَرَّارْ وْ نَجْمَتْ الصَّبَاحْ
يَا إلَهِي وَ الطُفْ يا ذَالكَرِيمْ بِيَّا **** طَالَتْ إيَّامْ الهِيجْرَة وَ انْحَيَاوْ لَجْرَاحْ
من فرَاقْ احْبَابِي تَجْرِي دْمُوعْ لَلْمَاح ****
*استخبار *
مَنْ حَسْنْ اصْوَاتْهَا تْزِيدْ لَلْقَلْبْ سْرُرْ **** فِي مْنَابَرْ حُرْمْهَا تَمْجِيدْ اصْدَاهَا
فَاقَتْ بَجْمَالْهَا علَى عَذْرَاتْ الحُورْ **** فُوقْ هْلاَلْ الجَبِينْ مَطْلُوقْ ارْدَاهَا
القَاصَدْ حُرْمْهَا اظْحَى ذَنْبُو مَغْفُورْ **** رَحْمَتْ رَبْ العِبَاد لَلْخَلْقْ انْشَاهَا
أشْ غَنَمْ فِي الحَيَاتْ أشْ رَا مَنْ لاَ رَاهَا****
*مطلع*
أشْ رَا مَنْ لاَ رَا بِينْ الملاَحْ عَذْرَة **** تَنْجْمَعْ ذَالحَضْرَة بْلاَ نَكْدْ لاَ حْسُودْ
بَالهَنَا وَ البُشْرَة زَاهِي مْسَاء وْ بُكْرَة **** لاَ رْقِيبْ لاَ وَاشِي لاَ غُشْ لاَ انْكُودْ
تَحْتْ نَجْمْ الزَّهْرَة أهْلْ الهَوَى اسْهَارَى **** وَ دْمُوعِي لاَ فَتْرَة تَجْرِي عَلَى الخُدُودْ
*بيت*
فِي رِيَّاضْ مْزَخْرَفْ وَ انْوَاوْرُو عْفِيَّة **** تَحْتْ ظَلْ اوْرَاقُو بِينْ الزَّهْرْ وَ القَاحْ
وَ الطُّيُورْ تْغَرَّدْ بَصْوَاتْهَا الزَّهِيَّة **** عَلَى مْنَابَرْ لَغْصَانْ يَنْشَدُو فِي لَدْوَاحْ
يا إلَهِي وَ الطَفْ يَا ذَالكَرِيمْ بِيَّا **** طَالَتْ إ يَّامْ الهَجْرَة وَ انْحَيَاوْ لَجْرَاحْ
مَنْ فْراقْ احْبَابِي تَجْرِي دْمُوعْ لَلْمَاحْ ****
*استخبار *
اطْيَارْ الرُّوضْ نَاطْقَا بَلْسَانْ الحَالْ **** فِي بْسَاتَنْهَا تْمَجَّدْ الحِيْ الدَّايَمْ
بَالصَّلَاةْ عْلِيكْ يَا سَيَّدْ لَفْضَالْ **** نَالُو بِيهَا رْجَالْ وَ اسْعَاوْ غْنَايَمْ
نَطْلَبْ الله انْجَدَّدْ الشُّوفْ بْلَنْجَالْ ***** فِي حُسْنْ ابْهَاكْ يَا اخْيَارْ ابْنُ هَاشَمْ
مَنْ لِيلَةْ فُرْقَتَكْ بْقَى عَقْلِي هَايَمْ ****
*مطلع*
الفْرَاقْ فْرَاقِي عَنْدِي فْرَاقْ لَكْبَرْ **** مَعَ النَّبِي وَ اصْحَابُو العَشْرَة المَفَضْلِينْ
يَا دْرَى انْعَاوَدْشِي مَرَّة اخْرَى وْ نَنْظَرْ **** فِي بْهَاك الفَايَقْ يَا نُورْ كُلْ عِينْ
طَالْ وَعْدَكْ بِيَّا وَ انَا اشْحَالْ صَابَرْ **** يَا ظْرِيفْ الَمَبْسَمْ وَ الخَدْ وَ الجَبِينْ
*بيت*
يَا دْرَى تَعْطَفْشِي عَطْفْ الرِّضَا عْلِيَّا ***** نَدْخَلْ تَحْت لِوَاكْ انَا وَ نَسْتْرَاحْ
يُومْ شَدَّةْ المُتْ تَحْظَرْ انْتَ مْعَيَا *** * تْقُولْ يَا مَدَاحِي مُضْمَانْ شَدْ مَفْتَاحْ
يَا إلَهِي وَ الطَفْ يَا ذَالكَرِيمْ بِيَّا**** طَالْتْ إيَّامْ الهَجْرَة وَ انْحَيَاوْ لَجْرَاحْ
مَنْ فْرَاقْ احْبَابِي تَجْرِي دْمُوعْ لَلْمَاحْ ****
*استخبار *
يَا نُورْ الحَقْ يَا احْمَدْ شَارَقْ لَنْوَارْ **** بَشَّرْنِي فِي الحَيَاةْ نَاخُذْ عُنْوَانِي
مَتْوَلَّعْ فِي مْدِيحَكْ مَا دَامَتْ لَعْمَارْ **** حَتَّى يَقْضِي الإلَهْ بَلْبَاسْ اكْفَانِي
مُوحَالْ يْكُونْ شَعْرَكْ مَنْ أهْلْ النَارْ **** خُوصُوصْ أسْمِي عَلَى اسْمَكْ بِيهْ ضْمَانِي
نِهَايَةْ قَصْدِي ثْبَاتْ بْنَطْقْ لْسَانِي ****
*مطلع*
انْتَهَا مَقْصُودِي فِي بْيَاتْ نَظْمْ لَشْوَاقْ **** مَنْ عَذَابْ الْفُرْقَة وَ فْرَاقْ أوجُوهْ لَحْبَابْ
يَسْتَلَذْ بَهْوَاهَا مَنْ بِيهْ مَحْنَتْ لَفْرَاقْ **** مَنْ حْبِيبْ وْ مَحْبُوبْ وْ مَنْ قْرَابْ وَاصْحَابْ
بَنْ سْمَاعِيلْ لْهَجْرَتْ لَحْبَابْ مَا طَاقْ **** مَنْ صْمِيمْ اكْبَادُو دَمْعْ العُيُونْ سَكَّابْ
*بيت*
عَلَى تْمَامْ السَّبْعِينْ اهْوَاهْ سَاقْ لِيَّا**** بَعْدْ مِيتِينْ وَ الَفْ ازْهَاتْ بِيهْ لَرْوَاحْ
بَعْدْ هَجْرَةْ مَكَّة بَقْدُومْهَا الزَّكِيَّة **** صُبْحْ عِيدْ الأضْحَى يَاقُوتْ ضْيَاهْ لَاحْ
يَا كْرِيمْ اغْفَرْ ذَنْبِي وْ ذَنْبْ وَ الْدِييَّا **** وَ اغْفَرْ لَلسَّامْعِينْ جَمْلَة وْ كُلْ مَدَّاحْ
يَا إلَهِي وَ الطُفْ يَا ذَالكْرِيمْ بِيَّا **** طَالَتْ إيَّامْ الهِجْرَة وَ انْحَيَاوْ لَجْرَاحْ
مَن فْرَاقْ احْبَابِي تَجْرِي دُمُوعْ لَلْمَاحْ ****
*تَمَّتْ بِعَوْنِ الله*