الأسنان_اللبنية_والتقويم
أولا الأسنان اللبنية عددها 20 وربنا أكرمنا بيها عشان تأدية وظيفتها في الأكل والكلام وكمان الشكل الجمالي
لغاية ما الفك ينمو ويبقي جاهز للأسنان الدائمة اللي حيكمل بيها الأنسان عمره
وليها وظيفة مهمة جدا وهي بتحفظ المكان الأسنان الدائمة وتساعد علي نمو الفك وكمان بتبقي مرشد وعلامة علي الطريق للأسنان الدائمة هيا وبتخرج
طيب إمتي نحشيها ؟؟؟؟
ربنا جعل لكل سنة معاد تتغير فيه من سن 6 سنين الي سن 12 سنة
فمينفعش نخلع سنة حتبدل في سن 11 سنة في سن 6سنين يعني قبل ميعاد تبديلها ب 5 سنين ونقول مطلعتش ليه !!!!!!
طيب السنة عاملة مشاكل ومسوسة وتاعبه الطفل نعمل أيه ؟؟؟؟
ليها حل من اتنين :-
١- السنة ينفع تتحشي أو حتي نركب لها طربوش وفي الحالة دي لازم نحشيها ونحافظ عليها لحد متبدل طبيعي في ميعادها
٢- السنة متكسرة خالص أو متنفعش تتحشي وفي الحالة دي بنخلعها ولازم نعمل مكانها حافظ مكان يحافظ على مكان السنة الدائمة لحد متطلع
طب السنة مخلوعة من فترة ومعملتش مكانها حافظ مكان أعمل أية دلوقتي ؟؟؟؟؟؟
مش مشكلة في أنواع من حافظ المكان بنرجع بيها المكان والفراغ اللي ضاع
طيب إبني أو بنتي طلعلها سنان من جوة ورا سننها أعمل أيه ؟؟؟؟؟
أول متلاحظي ده علطول تروحي لدكتور أسنان يخلعلها ألاسنان اللبنية عشان الأسنان الدائمة اللي من جوة دي ترجع مكانها من غير تقويم إن شاء الله
هوا ايه اللي حيحصل لو معملتش الكلام ده لما السنة وجعت الطفل خلعتها وخلاص ؟؟؟؟
كدا بالإضافة إلي مشاكل الطفل في الكلام والأكل وكمان النفسيه عشان صحابه بيضحكوا عليه كمان في احتمالية عالية إن الأسنان الدائمة تطلع مخلوفة ومش مظبوطة