غيم المحنة ع لعقل سدا بسحاب *** درڤ كاف الزايخة عني غطاه
أتهلك ريح المحبة جاب ضباب *** هاذي مدة يا حبابي ما شفنــاه
توحشنا خيالها عن عيني غاب *** لامن جا من شورهم و سقسيناه
حتى من لخبار عزت يا لحباب *** لا سبة و تڤودكم لينـــا ها واه؟
يا عياية هاج هاذ الڤلب و طاب *** أتعذب و زاد دّرك الشوق علاه
ماسلتي عنا واه الضن و خاب *** لامن بشرنا بخبرك و كـافينـــاه
يحكي لي عنها راه ڤليبي ذاب *** عوَد عني ڤول محبوبي وش راه
فاجي همي راه كثرتلي لعطاب *** جرح الڤلب دفين ماصبناش دواه
يا ضيفي يهديك حدثني بصواب *** بشر خبر الخير مدة ما سمعناه
يا مُضيف جيتكم من بُعد آعلاب *** خبر الخير اللّي أنتـايا تستنــاه
لا نتسول عن زينة العين ولهذاب *** تستنى في رجعوكم هذا معتاه
أعصّرني ڤلبي أبڤدرو ما جاب *** ما بين ضلوعي فرفر زاد آبلاه
ما عنديش دوا يشافي لا طباب *** و لا حيلة ولڤيتها تنفع مــــعاه
لا حكيم فقيه و يعرف لآتسباب *** بطلاسيم الجان كنـا حضرنـاه
لا ميعاد الزّين و يفتح لي ذالباب *** و لا تنفع هدة نديرو ليها جاه
ماضنيت البُعد يولي لك آسباب *** ڤلب العاشق ياك شي ما يخفــاه
يا ولفي يهديك آقهرني لعذاب *** يا شومة وش بيه ڤلبك ذا مڤساه
من وحشك نحس نشّبني نشّـاب *** ونشّاب الحب يعطب يا مرداه
سامر يڤدي في حشايا نا لهّـاب *** فـــحّم لي لُفّــاد و ڤليبي كـــوّاه
حبك يا عطرة منو راسي شاب *** سُلطان العمر خـطفو لـي و دّاه
بقلمي : م.الشريف حمامه
الإثنين 15 مايو - 11:57
