محبة يا سهلا بهاذ القمر عليا طل *بقلمي*

يا سهلا بهاذ القمر عليا طل ****بدر النصفية لكامل في لوصاف
يامحلا ذيك السمايم كي لعسل****نسبتها عربي مأصل من لشراف
مقواه الا كان عقلي راه اشل****من شوفتها يا لخاوة عدت نخاف

هذي آية فزينها لا يتمثل****و دارو عنها محاجية بالتخراف
من نظرتها شحال من قايد ذل****ومن طولتها يروح امتلف تتلاف
ما فيهاش اعيوب شينة ماتتمل****ما تلقى فيها نقيصة لا تقصاف

مربوعة فالقد أخفيفة فالضل****مسبوكة لقداد عريضة في لكتاف
اطولة نخلة ما تتعبر بانخل****دقلة نور اللي موكل للتضياف
فالبنة عسلة الذايقها يحصل****عسل النحلة ليمربي في لرياف

يا لايمني طار قلبي و نزل****لابى يرجع لي معها دار احلاف
مقواه الا كان جسدي راه اهزل****ما ننسى لمحط مرطب لتصياف
يا سايلني في هواها لا تسأل****لاتهوض لجراح زادوني تضعاف

قالوا ما تعيا امتبعها وتزل**** ساعفنا خليك من هاذ التعياف
قلت لهم مانطيق ننساها بسهل****ما هو رايي راه ذالقلب السياف
حاتمني لرموز صعبة ما تتحل****عييت نطاوع فيه احسبتو عراف

مانقدرش انقول هاذ القلب اهبل****وعاد يهاذي في كلامو بتخلاف
ياخوتي عقلي اتلى عنو واسل****لامن ينصرني ولا من عني ناف
يا وخذي شيان حالي واتبهدل****وتقير لوني على ضريفة لخفاف

اشعراقرابي كظلمة طاح اسبل****ع جبهة قنديل فوقو دار احقاف
الحاجب و العين مليانة بكحل****و الشنوفة طابعتهم في التنظاف
اشفايف و اخدود بنعمان وفل**** المبسم مصموت يحلف فالشواف

الرقبة صاري الما منو طل****طبعوها ذوك السوالف نعت لحاف
صدرك طحطاحة للفارس ينزل****موالف للعودات فالركبة خطاف
قرسولو تفاح للخاوي موكل****و يحاذر روحو خوف من المنداف

الجوف المطوي عندك كتوصل****اسوكى بلاك اتتقر ابلرداف
راحة في المكان بلاك لاطول****اقصب في الزورة خليها تخفاف
المورد معروف فيه الما يجمل****من شربة وحدة يملي بالقراف

يا تمحاني منين يروى يتعدل****ما يتمل شراب ماها ما يتعاف
صانع متمكن فصنعو متماهل****طاعت لوعلوم يحرفها تحراف
عذروني لاكان فوصفي ندقل****هاذالقمرة شوفها محنة و زعاف

من نشوتها في هلاكي متعلل****خلوني في حالتي نا عقلي صاف
هذا حال العاشق ديمة متبهدل****حليلو مسكين راه عندو ماشاف
يا عاقل لاتلوم مسجون مسلسل****في غرام أم بريم نوارة لعطاف

قاضيها نفاني في حكمو عول****واقسى عني راه درباني من كاف
ارماني في برور نعيا ما نوصل****قطعات ابعاد ما يقطنهم خواف
يا مضنوني من اقدى ليهم يهمل****على شوفات العين تلفهم تتلاف

الله لالي شيهان عربي و مأصل****في الفزة بارود يزرف تزراف
أدهم حامق ليلي في لونو يشعل****و الحافر انحاس يلهد فالتقراف
سرجو فيلالي في صنعو يكمل****مطروز امذهب من شغلت حراف

و البدة ربيع نوارها يخبل****و الدير المسبوك عالبادرة لحاف
وركابو قنديل عالخف امسهل****لشبورو نجام في الرشخة يحراف
يرجعني لوكار ولفي يا راجل****يفاجي عني هموم حاملها و زعاف

في رمشة من العين بيا يوصل****نتمسى في برور مقدودة لطراف
وحش العارم قامن شوفتها يذبل****و يريح قلبي من قبنو يخفاف
ويرجع دمع العين الوادو يحمل****اتنور لفصول و يزهارو لعطاف



تمت بقلمي